სვეტიცხოველი ნაგებია კარგად გათლილი რბილი ნაცრისფერი მოყვითალო და მომწვანო ქვიშაქვისა და ტუფის კვადრებით.
ტაძრის გეგმას საფუძვლად უდევს ჯვარი აღმოსავლეთიდან
დასავლეთისაკენ წაგრძელებული მკლავებით. გარედან ტაძარი სწორკუთხედშია
ჩაწერილი. მკლავების გადაკვთაზე, თავისუფლად მდგომ ოთხ ბურჯზე დამყარებულია
მაღალყელიანი, თექვსმეტსარკმლიანი გუმბათი.
სასახლე მდებარეობს სვეტიცხოვლის გალავნის სამხრეთ კედლის სამხრეთ-დასავლეთ ნაწილის ქვეშ.
თარიღდება XI-ე ს-ით. 1963-64 წ.წ. ამ მონაკვეთზე ჩატარდა
არქეოლოგიური გათხრები, რომლის დროსაც გამოვლინდა სხვადასხვა დროის
ნაგებობათა ნაშთები, რამდენიმე მარანი და სხვა.
ძირითადი ნაგებობაა მელქისედეკისეული სასახლე (38,5´18,5მ).
საძირკველზე ორსაფეხურიანი ცოკოლი და ქვიშაქვის კარგად გათლილი კვადრებით
ნაშენი კედელია ამოყვანილი. ნაგებობის კედლებზე, როგორც ფასადებზე, ისე
შიგნით 3,5მ მანძილზე პილასტრებია. სასახლეს კარები (სიგანე 3,5მ) ჩრდილოეთ
მხარეს აქვს. აქვე აღმოჩნდა თლილი ქვის იატაკის ნაშთი. დადგინდა, რომ
სასახლე დაშენებულია უფრო ძველ კულტურულ ფენაზე.
მელქისედეკის სასახლე რამდენჯერმე გადაუკეთებიათ. პირველად
XIV-ე საუკუნეში, როცა მისთვის მოუშლიათ ორსაფეხურიანი ცოკოლი, ხოლო
სამხრეთ და ჩრდილოეთ კედლებისათვის გარედან ყოველი 6-7 მ-ის გამოშვებით
მიუშენებიათ კონტრფორსები. შემდეგ სასახლისთვის აღმოსავლეთიდან მიუდგამთ
მინაშენი, რომლის აღმოსავლეთ კედელზე შემორჩენილია პილასტრი, ხოლო სამხრეთ
კედელში ბუხარია დატანებული. XVII-ე ს-ში დანგრეული სასახლე და მინაშენი
სვეტიცხოვლის ტაძართან ერთად შეუკეთებიათ როსტომ მეფესა და მარიამ
დედოფალს.
შემდგომ პერიოდში სასახლე მთლიანად დანგრეულა. ამჟამად
რესტავრირებულია დასავლეთ კედლის სამხრეთ მხარე დანარჩენი კი
დაკონსერვებულია ცოკოლის სიმაღლეზე.
ხშირ გადაკეთებათა გამო შენობას შეცვლილი აქვს პირვანდელი სახე.
ამჟამად აქ მოთავსებულია მცხეთის მუზეუმი.
