მართლმადიდებელთა მოძრაობა "წმინდა რუსეთის" ხელმძღვანელის ივან ოტრაკოვსკის ინიციატივით, მოსკოვში უკვე იქმნება მართლმადიდებელთა რაზმები ქრისტიანული სიწმინდეებისა და საეკლესიო პირების დასაცავად.

მისი აზრით, ასეთი რაზმები რუსეთის სხვა ქალაქებშიც უნდა შეიქმნას.

ოტრაკოვსკის სიტყვებით, ეს ჯგუფები მოხალისეებით დაკომპლექტდება და ისინი ქალაქში იმორიგევებენ, ძირითადად, საღამოობით. მათი მიზანი იქნება, შეებრძლონ "აგრესიულ ქმედებებს მღვდლების წინააღმდეგ" და "მკრეხელურ მოქმედებებს სიწმინდეების მიმართ". მოსკოვში უკვე შექმნილია 7 მობილური ჯგუფი. თუ მორიგე რაზმის წევრები შენიშნავენ, რომ ვინმე აბუჩად იგდებს მღვდელმსახურს ან გრაფიტით რამეს წერს ტაძარზე, მათ უნდა დააკავონ ეს პირი და გამოიძახონ პოლიცია.

თუ დამნაშავე გაქცევას შეეცდება, რაზმის წევრებმა ამაში ხელი უნდა შეუშალონ, ოღონდ უბრალოდ დაიჭირონ, ძალადობის გარეშე. ოტრაკოვსკი ირწმუნება, რომ ასეთ შემთხვევებში ჩხუბი და კონფლიქტები არ მოხდება, რადგან "მართლმადიდებელი ადამიანი ძალიან წყნარი და თავშეკავებულია". მისი აზრით, ასეთი რაზმები მთელს რუსეთში უნდა შეიქმნას, რადგან "მართლმადიდებლებმა თავისი რწმენა უნდა დაიცვან". "ჩვენ არ გვყავს პირადი მტრები, მხოლოდ რწმენის მტრები არსებობენ," - დასძინა მან.

სინოდის იმ განყოფილების ხელმძღვანელმა, რომელიც კურირებს ურთიერთობებს შეიარაღებულ ძალებთან და სამართალდამცავ ორგანოებთან, დეკანოზმა დიმიტრი სმირნოვმა განაცხადა, რომ მოხსენების მომზადებას აპირებს; მასში დაასაბუთებს, რომ საჭიროა მართლმადიდებლური ტაძრების დაცვის გაძლიერება. ამას იგი ტაძრებზე თავდასხმების გახშირებით ხსნის და იმედი აქვს, რომ ეკლესიის მსახურთა უმრავლესობა ამ იდეას მხარს დაუჭერს.

ტაძრებზე თავდასხმებმა ბოლო დღეებში მართლაც იმატა, მას შემდეგ, რაც პანკ-ჯგუფ "Pussy Riot"-ის წევრებს ორი წელი მიუსაჯეს "ანტიპუტინური ლოცვისთვის". რუსეთის მართლმადიდებლური ეკლესიის ხელმძღვანელობამ უკვე განაჩენის გამოტანის შემდეგ (?!) ხელისუფლებას მიმართა თხოვნით - "კანონის ფარგლებში გამოიჩინონ გულმოწყალება მსჯავრდებულების მიმართ იმის იმედით, რომ ისინი მკრეხელური მოქმედებების გამეორებაზე უარს იტყვიან."

რუსეთის მართლმადიდებლური ეკლესიის ოფიციალურმა წარმომადგენელმა, სინოდის საზოგადოებასთან ურთიერთობის განყოფილების ხელმძღვანელმა დეკანოზმა ვსევოლოდ ჩაპლინმაც იმედი გამოთქვა, რომ "მართლმადიდებლური პატრულის" იდეას რუსეთის სხვა ქალაქებიც აიტაცებენ. მისი აზრით, ეს არის სწორი მიმართულებით გადადგმული ნაბიჯი და ხალხი თავისი სიწმინდეებისა და ტაძრების დასაცავად უნდა გაერთიანდეს.

სხვათა შორის, მართლმადიდებელთა რაზმები რუსეთში 2008 წელსაც შეიქმნა და მაშინაც ამ იდეას დეკანოზმა ვსევოლოდ ჩაპლინმა დაუჭირა მხარი. ამ რაზმების წევრებს იგივე უფლებები ჰქონდათ, რაც სახალხო რაზმების წევრებს.

ამ იდეას ღიად დაუპირისპირდა ადამიანის უფლებათა დამცველი ლიუდმილა ალექსეევა და რუსეთის ომბუდსმენი ვლადიმირ ლუკინი. სკეპტიკურად არიან განწყობილი ასეთი რაზმების მიმართ მუსულმანი სასულიერო პირებიც.

ლუდმილა ალექსეევას აზრით, ასეთი რაზმების შექმნა კონსტიტუციას ეწინააღმდეგება, რადგან რუსეთი მულტირელიგიური და მრავალეროვნული სახელმწიფოა, სადაც მართლმადიდებლობა სახელმწიფო რელიგია არ არის. ის აცხადებს, რომ თუ მართლმადიდებლები საკუთარ სიწმინდეებს დაიცავენ, სხვა რელიგიების სიწმინდეებსაც დასჭირდებათ დაცვა. ალეკსეევა გამოვიდა ათეისტური რაზმების შექმნის იდეით.

მუსულმანების ცენტრალური სასულიერო სამმართველოს თავმჯდომარის მოადგილემ, მოსკოვის მუფტიიმ ალბირ კრგანოვმა განაცხადა, რომ სახალხო რაზმების იდეა კარგია იმ შემთხვევაში, თუ ისინი რელიგიებისა და ხალხების ერთობის პრინციპით შეიქმნება. მისი აზრით, ნონსენსია მრავალეროვნულ და მულტიკონფესიურ სახელმწიფოში რელიგიური და ეროვნული ნიშნით რაზმების შექმნა. მან თქვა, რომ თუ ყველა ამ პრინციპით შეიქმნის "საკუთარ არმიას" ბაშკირეთში, თათრეთში, ჩუვაშიაში, ბურიატიაში და კავკასიაში, რაღაც გაუგებრობა გამოვა. რუსეთის ისლამური უნივერსიტეტის რექტორმა რაფიკ მუხამეტშინმა განაცხადა, რომ ყველა რელიგიის სიწმინდეები უნდა დაიცვან პროფესიონალებმა, ხოლო მობილური რაზმებით დიდი ეფექტი არ იქნება. რუსეთში თავს ესხმიან არა მარტო ქრისტიანულ ტაძრებს. მაგალითად, რამდენიმე დღის წინ მახაჩყალაში მეჩეთში შეიარაღებული პირი შევარდა და სროლა ატეხა, რის შედეგადაც 8 ადამიანი დაიჭრა.

"მართლმადიდებლური რაზმების" წინააღმდეგ გამოვიდა ომბუდსმენი ვლადიმირ ლუკინი. მან ამას «საშინელი წინადადება» უწოდა და ყველას, მათ შორის, კონსტიტუციის გარანტს საკითხში გარკვევისკენ მოუწოდა. მისი აზრით, "ძალის დოზირებულად გამოყენების უფლება" მხოლოდ სახელმწიფოს აქვს.

ლუკინმა ასევე გადაჭარბებულად მიიჩნია "Pussy Riot"ის წევრებისთვის გამოტანილი განაჩენი და ის ამ ვერდიქტის გასაჩივრების საკითხს სერიოზულად განიხილავს. ლუკინს ამის უფლება ექნება იმ შემთხვევაში, თუ შემდეგი სასამართლო ინსტანცია მას ძალაში დატოვებს. თუმცა იმედი გამოთქვა, რომ სასამართლო აპელაციას უფრო ყურადღებით განიხილავს